LUISAO
Atungmasot Kapai, 10 June 2014
Makha (June) kachangli masapai mada kashan kachon shinkhui laga zattu-a. Ringkapha akhana
ngasotnao chalak eina ot sakhangarum-ngalanao zanglui haikha langpong dala sashap. Thuiphop khawui
khangacha ot hi thakda sakup hailaka mi tantakli thakmeida zatngaiya. Lakashong ngalanaoli thakda
ngasam ngasak haida ot shaksa ngasak kala samatha khuiya. Naongarana masakhangai chi Ava-avana
samida tantak huilak eina unga.
Langpongda sei-ot salaga chot haida ravai khavai ramli ot shok khuiya. Khangacha tantak eina thakfaya.
Lui wui kathuk zangkhaleo meikachi thotkaya. Iya ringkapha! Langpongda kakhangwui kachot. Tangkhul
luiwuk kachunga kongna alungthungli longa. Chungkhamei khana kong hili thari saya. Chithahaikha
kongwui ayar khanihi lui ngasaya kala kha khanina vazaya. Laa samaman kongli kazang tharan chingri
haiya. Charshi kahai meikhut kazingram mali kalaka yangta kachia kuisam hungrishi chaiyang theiya.
Taling laka khayang tharan kashan khamorli makeishanda phasa alungli mi akha ngathumda khalei thada
ngatha taraiya. Miwui otli bichar masa asada kasaisai thekmaman ila ravai khavai ngaransaya.
Kapeishang kapeita lala chirikha kahak kongli ini manga. Iwui khanukna awui mangashong ngareiya, phei
teomeikha makaklaga kui khayaore haosada pamzanga. Ningli khamakhao khikhala mazangmana kha,
kala shilak eina awui kashan tatunghaowa. Masi marna phanhaida tatung kahai daleira. Atam chang chili
mikli amalao zanghaida manganing kapai thumana. Phei makak, kuina mashoda yang, tara mikli
ngaphitshan tarai, chithalala mik sipsa khangai sipsaya. Matakhak kahai akhana, chiyakha ringkhanga
mik chila second kathum shakha ringphalak eina rakshapa.
Shanao pachi ravai tatharna. Iramnao maning mana. Zingyinlamwui zimikna kapkashan awui phasa
hungrishi theiya. Hanshok haosa dala machuk kha, mirinli khanishi luirala! Iniwui khamatak hi pheikhar
thara shakhana. Anava ravai tathar sahaida mashok ngaithu, ina hikatha phakazat sahao. Ngatartei
ngarei shanglaga ravaikasa makheida ngareithui haowa. Zur kachang sahao, ngashun ot kasawui
khamakhao, hapta khaniwui mara khavai zangda iwui shikhari nurlala matamana. Kuili shampoo
kachungchung teikata amalaochi pang eina mayitkhuida kongli chihotaya. Zur, Lingsang lala shokphapha
kachi atam, vanaona vanao khangachei, kheitakahai amalao on ngacheiser haowa. Ngalavana ravaida
khalei apamwui tara kong thada malongluila nganinglaga pama.
Makheida thekkashi, pamzanglagala yang, nganingkalui, marar thuda taralungli zang ngaphumda ning ot
kachungkha saya. Thuinganing laga shampoo teilui haosada kakhui tharan nganaipat akhong
tatunghaowa. Ngalava chila atam chang chili iwuivak ngareishanga. Ngaironron kheita maman tarawui
wave thada iwui asheela melody leilak eina zat dalei. Ala nganinglaga yang, ila nganinglaga yanga.
Ngatartei awui pamkhavaili tashunga. Shampoo khong china remeithuida ngalava wuishong pheili
tangatakka, chiwuithili yashongli ngatak luiya. Ngatak kupkahaiwui thili iwuishong akhashi nganingungda
salam sakhui. Tarana pangmei haoda azingshong kheitathui haowa. Philava khitui khala mahangla awui
ot shaksakhui phungda ramvak shokhaowa.
Edited By Khanrin Editorial Team 2021-2022